ლანჩხუთის მუნიციპალიტეტის მერიაში პერსონალურ მონაცემთა დაცვის სამსახურის თანამშრომლებმა ახალი კანონით გათვალისწინებულ ცვლილებებთან დაკავშირებით საჯარო სექტორის წარმომადგენლებთან რეგიონული შეხვედრების ციკლის ფარგლებში, ტრენინგები ჩაატარეს.
სამსახურის იურიდიული დეპარტამენტის უფროსის მოადგილემ შავლეგ თოდუამ და გეგმური ინსპექტირებების დეპარტამენტის უფროსის მოადგილემ ავთანდილ ლეფსვერიძემ ტრენინგების ფარგლებში ყურადღება გაამახვილეს შემდეგ მნიშვნელოვან საკითხებზე: პერსონალური მონაცემების დამუშავების საფუძვლები და პრინციპები, სუბიექტის უფლებები, ინციდენტის შეტყობინების ვალდებულება, მონაცემთა დაცვაზე ზეგავლენის შეფასება, მონაცემთა უსაფრთხოება, მონაცემთა დაცვის ოფიცრის ინსტიტუტი და კანონით გათვალისწინებული ადმინისტრაციული სამართალდარღვევები.
შეხვედრები კითხვა-პასუხის რეჟიმში წარიმართა. საჯარო სექტორის წარმომადგენლებს საშუალება ჰქონდათ განეხილათ კონკრეტული შემთხვევები.
შეხვედრას ესწრებოდა ლანჩხუთის მუნიციპალიტეტის მერი ალექსანდრე სარიშვილი, მერის პირველი მოადგილე ეკატერინე გუჯაბიძე, ასევე მერიის და მერიის მიერ დაფუძნებული ა(ა)იპების სხვა წარმომადგენლები.
