ლანჩხუთის მუნიციპალიტეტის საკრებულოს ბიუროს სხდომაზე, რომელსაც საკრებულოს თავმჯდომარე ბესიკ ტაბიძე უძღვებოდა, დღის წესრიგით გათვალისწინებული შვიდი საკითხი განიხილეს.ბიურომ იმსჯელა 2025 წლის ბიუჯეტში ცვლილებების პროექტზე, რომელიც მერიის საფინანსო-საბიუჯეტო სამსახურის უფროსმა, როლანდ ლაშხიამ წარადგინა.
ცვლილების თანახმად, რომელიც არსებული ბიუჯეტის ფარგლებში განხორციელდება, სოფელ ორაგვეში ტურიზმის განვითარების ხელშეწყობაზე ადგილობრივი ბიუჯეტიდან დამატებით 291 141 ლარი გამოიყოფა.
როლანდ ლაშხიამ ბიუროს ასევე ივნისის თვის ბიუჯეტის შესრულების ანგარიში წარუდგინა.
ივნისის თვის შემოსულებების სახით ბიუჯეტში მიღებულია 6 374 721 ლარი, მათ შორის შემოსავლების სახით 6 363 534 ლარი, გადასახადების სახით 2 263 451 ლარი. პირველი ივლისის მდგომარეობით წელთან მიმართებაში შემოსულებების შესრულება 61,8%-ია, გადასახადების შესრულება 52,8%.
ანგარიში ბიუროს მიერ ცნობად იქნა მიღებული.
ბიურომ მხარი დაუჭირა ლანჩხუთში, სკოლის მიერ გამოვლენილი წლის საუკეთესო მასწავლებლის ფულადი ჯილდოს ოდენობის 300-დან 500 ლარამდე გაზრდის პროექტს.
მერიის ადმინისტრაციული და სამართლებრივი უზრუნველყოფის სამსახურის უფროსმა, შოთა ჩაგუნავამ წარადგინა საკითხი ლანჩხუთის მუნიციპალიტეტის იმ დასახლებების ნუსხის დამტკიცების შესახებ, სადაც არ არის ავტოსადგური და საიდანაც ხორციელდება საქალაქთაშორისო რეგულარული სამგზავრო გადაყვანა.
შოთა ჩაგუნავამ ბიუროს ასევე წარუდგინა საკითხი ლანჩხუთის მუნიციპალიტეტის საგანგებო მართვის გეგმის დამტკიცების შესახებ. მასში დეტალურადაა განსაზღვრული სხვადასხვა ორგანოების ინსტიტუციური ვალდებულებები, მათი რესურსები და ყველა ჩართული მხარის ოპერატიული მოქმედებები მოსალოდნელი საგანგებო სიტუაციების დამაზიანებელი ზემოქმედებისაგან მუნიციპალიტეტის მოსახლეობის დაცვის მიზნით.
ბიუროს სხდომაზე მხარი დაუჭირეს ლანჩხუთის მუნიციპალიტეტის საკრებულოს რეგლამენტის ცვლილებების პროექტს, ასევე ქალისა და მამაკაცის თანასწორობისა და ბავშვთა საკითხებზე მომუშავე მუნიციპალური საბჭოს შექმნისა და მისი დებულების დამტკიცებას.
ბიუროს გადაწყვეტილებით, საკრებულოს მორიგი სხდომა 2025 წლის 29 ივლისს გაიმართება.
