ლანჩხუთის მერი ალექსანდრე სარიშვილი ადმინისტრაციულ ერთეულებში მერის წარმომადგენლებს შეხვდა.
შეხვედრაზე სოფლებში მოსახლეობის საჭიროებები განიხილეს, მათ შორის იმსჯელეს დიდთოვლობის შედეგად დაზიანებული სახლების რეაბილიტაციის შესახებ. აღინიშნა, რომ სტიქიის სალიკვიდაციო სამუშაოები, ხიდების რეაბილიტაცია და ნაპირსამაგრი ნაგებობების მოწყობა აქტიურად გრძელდება.
,,სოფლის მხარდაჭერის პროგრამის“ ფარგლებში 15 ადმინისტრაციული ერთეულის 55 სოფელში სხვადასხვა სახის პროექტების განხორციელება იწყება. მოეწყობა გარე განათებები, მოწესრიგდება შიდა გზები, იგეგმება წყალმომარაგების ქსელის რეაბილიტაცია და სარეკრეაციო სივრცეების მოწყობა.
როგორც ალექსანდრე სარიშვილმა შეხვედრაზე აღნიშნა, მნიშვნელოვანია, რომ განსახორციელებელი პროექტების პრიორიტეტულობას ადგილობრივი მოსახლეობა თავად განსაზღვრავს. ლანჩხუთის მერის თქმით, პროგრამა ხელს უწყობს მოქალაქეთა ჩართულობის გაზრდას სოფლისთვის მნიშვნელოვანი საკითხების მოგვარებაში.
შეხვედრას ლანჩხუთის მერის მოადგილეები ეკატერინე გუჯაბიძე და თორნიკე ტიკაძე ესწრებოდნენ.
