დღეს ლანჩხუთის ცენტრალურ სტადიონზე ევგრაფი შევარდნაძის სახელობის ტურნირი დაიწყო.
ევგრაფის თასის გათამაშებაში მონაწილეობას მიიღებენ გურიის, იმერეთის, სამეგრელოს და აჭარის ჭაბუკთა ნაკრებები.
ტურნირი სამ დღეს გაგრძელდება, ფინალური შეხვედრა კი 7 ივლისს გაიმართება.
დღევანდელ თამაშს გულშემატკივრებთან ერთად საკრებულოს თავმჯდომარე, კლუბ ,,გურიას“ პრეზიდენტი, ბესიკ ტაბიძე დაესწრო.
,, დღეს დაიწყო ევგრაფი შევარდნაძის სახელობის ტურნირი. ამ ადამიანს დიდი წვლილი მიუძღვის ლანჩხუთში ფეხბურთის განვითარების საქმეში და სასიამოვნოა, რომ დღეს სწორედ აქ, მისი სახელობის თასის მოსაპოვებლად ტურნირის პირველი ეტაპი დაიწყო“, აღნიშნა ტაბიძემ.
ტურნირი იმართება საქართველოს ფეხბურთის ფედერაციის, ქართული ფეხბურთის განვითარების ფონდისა და გურიის ფეხბურთის ფედერაციის მხარდაჭერით.
