ლანჩხუთის მუნიციპალიტეტის საკრებულოს წევრი, ლესის ადმინისტრაციული ერთეულის მაჟორიტარი ელისო ჭიჭინაძე რეგლამენტით განსაზღვრული უფლებამოსილების ფარგლებში ამომრჩეველს შეხვდა და მის მიერ გაწეული მუშაობის შესახებ ანგარიში წარუდგინა.
შეხვედრას საკრებულოს თავმჯდომარე ბესიკ ტაბიძე ესწრებოდა და როგორც აღნიშნა, მიზანი მოსახლეობის ინფორმირებულობის გაზრდა, საჭიროებათა გამოვლენა და გადაწყვეტილების მიღების პროცესში მაქსიმალური ჩართულობაა.
ელისო ჭიჭინაძემ 2018 წელს გაწეული მუშაობა შეაჯამა და აღნიშნა, რომ საანგარიშო პერიოდში ამომრჩეველთან შეხვედრა ინფრასტრუქტურულ და სოციალურ საკითხებზე გამართა. მისი შუამდგომლობით არაერთ მოქალაქეს გაეწია დახმარება სხვადასხვა სოციალური დახმარების ფარგლებში. სტიქიით დაზარალებულ მოსახლეობას გადაეცათ სახლის სახურავის მასალა.
მაჟორიტარმა ისაუბრა სოფელში განხორციელებულ ინფრასტრუქტურულ პროექტებზე: სოფელ ლესაში მოეწყო წყალომომარაგების ქსელი, „კორეას“ უბანში აღდგა რკინა-ბეტონის მილხიდი, განხორციელდა ნაპირსამაგრი სამუშაოები, სანიაღვრე არხები და გაბიონები, გაუვალ ადგილებში მოიხრეშა გზის სავალი ნაწილი, ჭინათში მოეწყო ნაპირსამაგრი და აღდგა გზა, მერაბ სულაბერიძის უბანში მოეწყო ბეტონის საფარი, „ფოცხვერეთის“ უბანში კი ალტერნატიული გზა, და ა.შ.
ამ ეტაპზე მიმდინარეობს ლესის საჯარო სკოლის სრული რეაბილიტაცია. სოფლის მხარდაჭერის პროგრამის ფარგლებში რეაბილიტაცია უტარდება საკონცერტო დარბაზს. წარმატებით მინდინარეობს გაზიფიცირების პროცესი და განცხადებების მიღება ბუნებრივი აირის შეყვანის თაობაზე.
მაჟორიტარმა სამომავლო გეგმებზეც ისაუბრა და როგორც აღნიშნა, მომავალ წელს ლესაში ახალი ამბულატორია აშენდება. ასევე იგეგმება გარე განათების მოწყობა.
სოფელის საერთო პრობლემად წყლის სისტემის რეაბილიტაციისა და შიდა გზების მოწყობის საკითხი დასახელდა.
შეხვედრა კითხვა-პასუხის რეჟიმში წარიმართა.
სრულად ანგარიშის ტექსტური მასალა იხილეთ მუნიციპალიტეტის ვებ გვერდზე www.lanchkhuti.gov.ge
