,,ლანჩხუთის მუნიციპალიტეტის ახალგაზრდული საბჭოს“ სხდომა გაიმართა, რომელზედაც ,,განათლების, განვითარებისა და დასაქმების ცენტრის“ (EDEC) ჰაბ ორგანიზაციას შორის მემორანდუმი გაფორმდა. პროექტის მიზანია ლანჩხუთის მუნიციპალიტეტში ახალგაზრდული საბჭოს გაძლიერება, რაც ხელს შეუწყობს ადგილობრივ დონეზე მონაწილეობრივი ახალგაზრდული პოლიტიკის შექმნას.
ღონისძიებას ლანჩხუთის მერი ალექსანდრე სარიშვილი და მისი პირველი მოადგილე ეკატერინე გუჯაბიძე დაესწრნენ. პროექტის მხარდამჭერია ლანჩხუთის მუნიციპალიტეტის მერიის განათლების, კულტურის, სპორტისა და ახალგაზრდულ საქმეთა სამსახური.
ურთიერთთანამშრომლობის მემორანდუმი გაფორმდა ,,სამოქალაქო საზოგადოების ინიციატივა: მდგრადი, ღია და ანგარიშვალდებული სამოქალაქო საზოგადოების ორგანიზაციები საქართველოს განვითარებისათვის“ ფარგლებში.
პროექტს ახორციელებს კონსორციუმი კონრად ადენაუერის ფონდის (KAS) ხელმძღვანელობით შემდეგ არასამთავრობო ორგანიზაციებთან ერთად: საქართველოს სტრატეგიული კვლევებისა და განვითარების ცენტრი (CSRDG), სამოქალაქო საზოგადოების ინსტიტუტი (CSI), კონსულტაციისა და ტრენინგის ცენტრი (CTC), განათლების განვითარებისა და დასაქმების ცენტრი (EDEC) და ევროპული პოლიტიკის ინსტიტუტი (IEP).
