მაჩხვარეთის მოსახლეობამ ანგარიში მოისმინა

მოსახლეობასთან შეხვედრები და ანგარიშის წარდგენის პროცესი აქტიურად მიმდინარეობს. ამჯერად ამომრჩეველს ლანჩხუთის მუნიციპალიტეტის საკრებულოს წევრი, მაჩხვარეთის ადმინისტრაციული ერთეულის მაჟორიტარი, გოდერძი ქურიძე შეხვდა და 2018 წელს გაწეული მუშაობის შესახებ ანგარიში წარუდგინა.

შეხვედრას საკრებულოს თავმჯდომარე ბესიკ ტაბიძე უძღვებოდა. ანგარიშის წარდგენას ადგილობრივ მოსახლეობასთან ერთად საკრებულოს წევრები კარლო კვიტაიშვილი და კახა ბოლქვაძე ესწრებოდნენ.

გოდერძი ქურიძემ კომისიებსა და ფრაქციაში მის მიერ გაწეული მუშაობის შესახებ ისაუბრა. ასევე იმ პროექტებზე გაამახვილა ყურადღება, რომლებიც მაჩხვარეთის ადმინისტრაციულ ერთეულში განხორციელდა როგორც საქართველოს მთავრობის, ასევე ლანჩხუთის მუნიციპალიტეტის მერიის მხარდაჭერით: მოეწყო სანიაღვრე არხები, გაბიონები, მილხიდები და ნაპირსამაგრები. რეგიონალური ფონდის მხარდაჭერით ასევე სანიაღვრე არხი მოეწყო წმინდა გიორგის ქუჩაზე.

მაჟორიტარის შუამდგომლობით დახმარება გაეწია მოქალაქეებს მედიკამენტების შეძენის, მრავალშვილიანი ოჯახების, იძულებით გადაადგილებულ პირთა დახმარების პროგრამების ფარგლებში. დახმარება გაეწია ასევე სტიქიის შედეგად დაზარალებულ ოჯახებს.

მაჟორიტარმა 2019 წელს სოფელში დაგეგმილ და მიმდინარე ინფრასტრუქტურულ პროექტებზე ისაუბრა. სოფლის მხარდაჭერის პროგრამის ფარგლებში სრულდება სოფელ მაჩხვარეთში ამბულატორიის რეაბილიტაცია, სოფელ ორაგვეში რემონტდება ადმინისტრაციული შენობა, სოფელ ჯუნჯუათში კეთდება 70 მეტრი სიგრძის სანიაღვრე არხი.

დაისვა ასევე პრობლემური საკითხები: გზის მოასფალტება, მაჩხვარეთის სასაფლაოს მიმდებარედ გარე განათების მოწყობა და წყლის სისტემის რეაბილიტაცია.

#გურია2019 #ლანჩხუთი2019 #მაჩხვარეთი

Share:

კომენტარის დატოვება