ლანჩხუთის მუნიციპალიტეტის საკრებულოში თავმჯდომარის ბესიკ ტაბიძის ხელმძღვანელობით, ბიუროს სხდომა გაიმართა. სხდომაზე დარგობრივ კომისიებს დღის წესრიგით გათვალისწინებული საკითხების განხილვა და შესაბამისი დასკვნების მომზადება დაევალათ.
ბიურომ დაამტკიცა საკრებულოს აპარატის 2026 წლის სამუშაო გეგმა და ადმინისტრაციული წარმოება დაიწყო „ლანჩხუთის მუნიციპალიტეტის 2025 წლის ბიუჯეტის დამტკიცების შესახებ“ დადგენილებაში ცვლილებების შეტანის თაობაზე, რომელიც ბიუროს წევრებს მერიის საფინანსო-საბიუჯეტო სამსახურის უფროსმა როლანდ ლაშხიამ გააცნო.
ბიუროს სხდომაზე ასევე მოისმინეს და ცნობად მიიღეს ლანჩხუთის მუნიციპალიტეტის 2025 წლის ბიუჯეტის ცხრა თვისა და ნოემბრის თვის შესრულების ანგარიშები, ასევე საკრებულოს მუდმივმოქმედი კომისიების შემადგენლობის შესახებ მიღებული გადაწყვეტილება. მუნიციპალიტეტის მერმა ალექსანდრე სარიშვილმა ბიუროს წარუდგინა ლანჩხუთის მუნიციპალიტეტის 2026 წლის ბიუჯეტის პროექტი და 2026–2029 წლების პრიორიტეტების დოკუმენტი.
სხდომაზე იმსჯელეს საკრებულოს რეგლამენტში ცვლილებების შეტანის, 2026 წლის ბიუჯეტიდან სოციალური დახმარების გაცემისა და მიღების წესის დამტკიცების, ასევე მუნიციპალიტეტის ქონების საპრივატიზაციო ობიექტების ნუსხისა და პრივატიზაციის გეგმის ცვლილებების საკითხებზე.
ბიუროს გადაწყვეტილებით, ლანჩხუთის მუნიციპალიტეტის საკრებულოს მორიგი სხდომა 24 დეკემბერს გაიმართება.
