საქართველოს აქვს უნიკალური, სტრატეგიული მდებარეობა, ჩვენ ტრადიციულად ვიყავით ევროპისა და აზიის დამაკავშირებელი ქვეყანა და გვქონდა ძალიან მნიშვნელოვანი სატრანზიტო ფუნქცია და ჩვენი ერთ-ერთი მთავარი ამოცანაა, მაქსიმალურად აღვუდგინოთ ჩვენს ქვეყანას ეს ტრადიციული, ისტორიული ფუნქცია, ამისთვის ჩქაროსნული ავტომაგისტრალის მშენებლობას განსაკუთრებული როლი და მნიშვნელობა აქვს, – ამის შესახებ საქართველოს პრემიერ-მინისტრმა ირაკლი კობახიძემ სამტრედია-გრიგოლეთის მაგისტრალის ახალი 8-კილომეტრიანი მონაკვეთის გახსნის ღონისძიებაზე სიტყვით გამოსვლისას განაცხადა.
4-ზოლიანი, უმაღლესი თანამედროვე სტანდარტების გზა, რომელიც 3 ახალ ხიდსა და 2 სატრანსპორტო კვანძს მოიცავს, მთავრობის მეთაურმა ინფრასტრუქტურის მინისტრ რევაზ სოხაძესთან ერთად გახსნა.
ირაკლი კობახიძემ ხაზი გაუსვა პროექტის მნიშვნელობას ქალაქ ლანჩხუთის და მიმდებარე სოფლების განტვირთვის კუთხით და აღნიშნა, რომ ეს ადგილობრივი მოსახლეობისთვის ნიშნავს ნაკლებ ხმაურს და მეტ უსაფრთხოებას, ხოლო მგზავრებისთვის – შემცირებულ დროს და მეტ კომფორტს.
“წელს ჩვენ უკვე გავხსენით რიკოთის უმნიშვნელოვანესი ნაწილი – რიკოთის შემოვლითი გზა. დღევანდელი 8-კილომეტრიანი მონაკვეთი არის სამტრედია-გრიგოლეთის 12-კილომეტრიანი გზის შემადგენელი ნაწილი. სამუშაოები აქტიურად გაგრძელდება და უახლოეს მომავალში დასრულდება მთლიანად ამ მონაკვეთის მშენებლობა. დღეისათვის ქვეყანაში უკვე აშენებულია 383 კილომეტრი მაგისტრალური გზა. სულ 68 კილომეტრი ჩქაროსნული ავტომაგისტრალი იყო აშენებული 2012 წლამდე საქართველოში. 2012 წლის შემდეგ აშენდა 315 კილომეტრი ჩქაროსნული ავტომაგისტრალი. ისიც გასათვალისწინებელია, რომ აქ საქმე გვაქვს ბევრად უფრო რთულ მონაკვეთებთან, რომელთა მშენებლობა უწევს ჩვენს ხელისუფლებას და კონკრეტულად, ინფრასტრუქტურის სამინისტროს. ეს ციფრები საუკეთესოდ აჩვენებს სხვაობას და აჩვენებს ჩვენს დამოკიდებულებას საქმისადმი. უახლოეს მომავალში დასრულდება აღმოსავლეთ-დასავლეთის ჩქაროსნული ავტომაგისტრალის მთლიანი დერეფნის მშენებლობა. ეს მოიცავს მთლიან მონაკვეთს, დაწყებული წითელი ხიდიდან, დამთავრებული სარფამდე. ჩვენ გვაქვს კონკრეტულად გაწერილი გეგმა, რომელიც ითვალისწინებს უახლოესი წლების განმავლობაში, მთელი ქვეყნის მასშტაბით, ჩქაროსნული ავტომაგისტრალის ყველა მონაკვეთის მშენებლობის დასრულებას”, – განაცხადა ირაკლი კობახიძემ.
პრემიერ-მინისტრმა ხაზი გაუსვა პარტნიორების როლს მსგავსი პროექტების განხორციელებაში და ევროპის საინვესტიციო ბანკს მადლობა გადაუხადა.
მთავრობის მეთაურმა პროექტის წარმატებით განხორციელებისთვის ასევე განსაკუთრებული მადლობა გადაუხადა ინფრასტრუქტურის მინისტრ რევაზ სოხაძეს, სამინისტროს, საავტომობილო გზების დეპარტამენტს, პროექტში ჩართულ თითოეულ მშენებელსა და ინჟინერს.
გზის გახსნის ღონისძიებას საქართველოს მთავრობისა და პარლამენტის წევრები, გურიის მხარეში სახელმწიფო რწმუნებული და ადგილობრივი ხელისუფლების წარმომადგენლები დაესწრნენ.
