ჩიბათის საჯარო სკოლაში პროექტის ,,იკითხე ქართული“ ფარგლებში, ახალგაზრდა ქართველ მწერლებთან შეხვედრა მოეწყო. პროექტის ინიციატორი გახლდათ ლანჩხუთი-ჩოხატაურის მაჟორიტარის, ნინო წილოსანის ბიუროს შექმნილი ახალგაზრდული პლატფორმა.
შეხვედრას ლანჩხუთის მუნიციპალიტეტის სხვადასხვა სკოლის მოსწავლეები ესწრებოდნენ, რომლებსაც გამომცემლობა ,,პალიტრა ელის“ ლიტერატურული კონკურის 2017-2018 წლების გამარჯვებულებმა – თათული ღვინიანიძემ, ნათია ჯაგოდნიშვილმა, გვანცა გუბელაძემ, ვახო ვახტანგაძემ, ნიკოლოზ ტოტოღაშვილმა და იაგო თვალაბეიშვილმა პირადი ისტორიები და გამოცდილებები გაუზიარეს.
,,ძალიან ბედნიერი ვარ, რომ დღეს ჩემს კოლეგებთან ერთად ჩამოვედი და შევხვდი ამ ჯანსაღ თაობას. უფროს თაობაში რატომღაც არსებობს მოსაზრება, რომ ახალგაზრდები არ კითხულობენ და არაფერი აინტერესებთ. რეალურად მე ვხვდები უამრავ ნიჭიერ ახალგაზრდას, მოტივირებულს და სურვილით სავსეს. დღეს ჩამოვედით იმისთვის, რომ მათთვის მოგვეყოლა თუ რამდენი წარუმატებლობა დგას ჩვენი წარმატების უკან. ვფიქრობ, რომ ჩვენ შევეხეთ მათ გულებს, თუკი ოდესმე გაუჭირდებათ, ჩვენი ამბები გაახსენდებათ და იბრძოლებენ“, აღნიშნა მწერალმა, თათული ღვინიანიძემ.
მწერლებთან შეხვედრას პარლამენტის წევრი ნინო წილოსანი, ლანჩხუთის მუნიციპალიტეტის საკრებულოს თავმჯდომარე ბესიკ ტაბიძე, მუნიციპალიტეტის მერი ალექსანდრე სარიშვილი, რესურსცენტრის ხელმძღვანელი, მერიისა და საკრებულოს თანამშრომლები ესწრებოდნენ.
პროექტი ,,იკითხე ქართული“, ლანჩხუთი- ჩოხატაურის მაჟორიტარის, ნინო წილოსანის ბიუროსა და და მერიის განათლების, კულტურის, სპორტისა და ახალგაზრული სამსახურის ფინანსური მხარდაჭერით განხორციელდა.
