იოანე ნათლისმცემლის სახელობის სასულიერო გიმნაზიაში დედა ენის დღისადმი მიძღვნილი ღონისძიება გაიმართა.
-ჩვენი წვლილი შევიტანეთ დედა ენის პოპულარიზაციის საქმეში. გადავწყვიტეთ დედა ენის თითოეული გვერდი გადაგვეწერა. დიდი რიდით, მოწიწებით და მოკრძალებით შევუდექით საქმეს – განაცხადა სასულიერო გიმნაზიის რექტორის მოადგილემ სასწავლო დარგში ლევან გიორგაძემ.
სასულიერო გიმნაზიის პედაგოგებმა შეასრულეს არაერთი სიმღერა, მათთან ერთად კონცერტში მონაწილეობა მიიღო ფრანგმა მოხალისე, ჟულიენ მორისმა.
დამსწრე საზოგადოება დალოცა პრორექტორმა დეკანოზმა მირიანმა (ფირცხალაიშვილი). დედა ენის დღესთან დაკავშირებით ვრცლად ისაუბრეს მოძღვრებმა, რომლებიც წლების განმავლობაში მოღვაწეობდნენ ამ სკოლაში.
ღონისძიებას ესწრებოდა მუნიციპალიტეტის მერიის განათლების, კულტურის, სპორტის და ახალგაზრდულ საქმეთა სამსახურის უფროსი ია ჩხაიძე, პედაგოგები და მედიის წარმომადგენლები.
