ლანჩხუთის მუნიციპალიტეტის საკრებულოს თავმჯდომარე, ნიგვზიანის მაჟორიტარი ბესიკ ტაბიძე ამომრჩეველს შეხვდა და მისი, როგორც მაჟორიტარის მიერ გაწეული მუშაობის შესახებ ანგარიში წარუდგინა.
ბესიკ ტაბიძემ ისაუბრა წლის განმავლობაში გაწეული მუშაობის შესახებ და იმ მნიშვნელოვან სამართლებრივ აქტებზე გაამხვილა ყურადღება, რომლებიც საკრებულომ საანგარიშო პერიოდში დაამტკიცა.
,,როგორც საკრებულოს წევრს, შეხვედრები მქონდა ამომრჩევლებთან, ასევე როგორც საკრებულოს თავმჯდომარემ დავნერგე მოქალაქეთა ყოველკვირეული მიღება. 2018 წელს 300-ზე მეტი მოქალაქე იმყოფებოდა მიღებაზე, მათ შორის ნიგვზიანის ადმინისტრაციული ერთეულიდანაც. მოთხოვნები ძირითადად შეეხებოდა სოციალურ დახმარებებს და ინფრასტრუქტურულ საკითხებს. არც ერთი მათი სატკივარი უყურადღებოდ არ დამიტოვებია. სოციალური მოთხოვნების დაკმაყოფილება შეძლებისდაგვარად მოხდა მუნიციპალიტეტის სოციალური პროგრამების ფარგლებში“, აღნიშნა ტაბიძემ.
საკრებულოს წევრმა ყურადღება გაამახვილა საანგარიშო პერიოდში განხორციელებულ ინფრასტრუქტურულ პროექტებზე: რეაბილიტაცია ჩაუტარდა ეგნატე ნინოშვილის სახლ-მუზეუმთან მისასვლელ გზას, მოასფალტდა ნიგვზიანი-ნინოშვილის დამაკავშირებელი გზა.სოფელ ჩანჩეთში, არჩეულსა და ხაჯალიაში მოეწყო და აღდგა მისასვლელი გზები, მოეწყო არაერთი ხიდი, მილხიდი, ყორე-ქვის გაბიონი, ნაპირსამაგრები და რკინა-ბეტონის არხები. ასევე სოფელ ჩიქვეთსა და არჩეულში (ნონა მიქაბერიძს სახლის მიმდებარედ) რკინა-ბეტონის გზა გაკეთდა. როგორც ბესიკ ტაბიძემ აღნიშნა, მნიშვნელოვანი მხარდაჭერა აქვს განათლების ხელშეწყობას.
ამ ეტაპზე მიმდინარეობს ნიგვზიანის სკოლის სრული რეაბილიტაცია, რომლის ინფრასტრუქტურა ევროსტანდარტების შესაბამისად მოწესრიგდება. წელს დაიწყება ხაჯალიის საბავშვო ბაღის მშენებლობა, რომელიც ასევე ყველა სტანდარტს და თანამედროვე გამოწვევას დააკმაყოფილებს.
2019 წელს სოფლის მხარდაჭერის პროგრამით ხორციელდება შემდეგი პროექტები: გარე განათება არჩეული ნინოშვილის დამაკავშირებელ გზაზე, „წიაღობანის” „ჯიხანჯირის“, „აფხაზავებისა“ და „ხეთის“ უბნებში. ნიგვზიანში შემოიღობება შინმოუსვლელთა მემორიალი, სოფ ხაჯალიაში კი ე.წ. ,,ბუკულოვების“ უბანში მოეწყობა მცირე სპორტული მოედანი. შეხვედრაზე მოსახლეობის მხრიდან დაისვა პრობლემური საკითხები: სოფელ ხაჯალიაში წყლის საკითხი, ნიგვზიანში წყლის ავზის შეკეთება, ნიგვზიანში (გოგიჩაიშვილების უბანში) სანიაღვრე არხების გაწმენდა, არჩეულში ცხაურის მოწყობა, ჯიხანჯირში ბეტონის გზისა და სამი მილხიდის მოწყობა, წიაღობანისა და ჯიხანჯირისთვის ოფიციალური სოფლის სტატუსის მინიჭება.
შეხვედრაზე ასევე აზიური ფაროსანას შეწამვლის საკითხი დაისვა. ადგილობრივების თქმით, მავნებელი თითქმის აღარ შეინიშნება და წერტილოვანი შეწამვლა მეტად ეფექტური გამოდგა.
ბესიკ ტაბიძემ მადლობა გადაუხადა მოსახლეობას და მისი უფლებამოსილების პერიოდში საკრებულოს და აღმასრულებელი ხელისუფლების თანადგომით ყველა იმ პრობლემური საკითხის გადაჭრას დაჰპირდა, რომლის წინაშე ნიგვზიანის ადმინისტრაციული ერთეულის მოსახლეობა დგას.
#გურია2019 #ლანჩხუთი2019 #ნიგვზიანი #შეხვედრაამომრჩეველთან
