ლანჩხუთის მუნიციპალიტეტს რუსთაველის მსახიობი, ყველასთვის საყვარელი არტისტი, მურმან ჯინორია სტუმრობდა თავისი მონო-სპექტაკლით „ქარი მწყურია მე პირდაპირი“. საათნახევრის განმავლობაში მსახიობი კითხულობდა ქართველი პოეტების, შოთა ნიშნიანიძის, მურმან ლებანიძის, ტერენტი გრანელის, ლადო ასათიანის, მიხეილ ქვლივიძის, ჯანსუღ კახიძის და რაღა თქმა უნდა, გალაკტიონის ლექსებს, ასევე შედევრებს ქართული ხალხური პოეზიიდან. სცენაზე სიტყვა მეფობდა, ჭეშმარიტი ქართული, მადლიანი სიტყვა და ლანჩხუთელი მსმენელიც, რომელმაც კარგად იცის ნამდვილი ხელოვნების ფასი და სულგანაბული უსმენდა სიტყვის ჯადოქარს, სიცოცხლეშივე ლეგენდად ქცეულ მურმან ჯინორიას. „ეს მართლაც დიდი საჩუქარია ჩვენთვის. მადლობა ბატონ მურმანს ჩამობრძანებისთვის და მადლობა თითოეულ იმ ადამიანს, რომელიც დღეს ამ საოცარ საღამოს დაესწრო“ – განაცხადა საღამოს დასასრულს ლანჩხუთის მუნიციპალიტეტის მერმა, ალექსანდრე სარიშვილმა. თავად მსახიობმა კი უდიდესი მადლობა გადაუხადა ლანჩხუთელებს მოსმენისთვის, მიღებისთვის, მასპინძლობისთვის: „როგორ წარიმართება სპექტაკლი მთლიანადაა დამოკიდებული მაყურებელზე, დღეს კი დარბაზში ისეთი მაყურებელი იჯდა, ყველა ნიუანსი რომ ესმოდა და თქვენც დაინახეთ, არც მსურდა დასრულებულიყო. დიდი მადლობა ამისთვის. სხვათა შორის, მეოთხედი გურული ვარ, აქ ჩემი დედულეთია და მიყვარს გურია, თუცმა ლანჩხუთში პირველად ვარ და აღფრთოვანებული ვარ თქვენით“ – დასძინა მურმან ჯინორიამ.
