ლანჩხუთის მუნიციპალიტეტის საკრებულოს წევრი, აკეთის ადმინისტრაციული ერთეულის მაჟორიტარი გოგი მორჩილაძე რეგლამენტით განსაზღვრული უფლებამოსილების ფარგლებში ამომრჩეველს შეხვდა და მის მიერ გაწეული მუშაობის შესახებ ანგარიში წარუდგინა.
მაჟორიტარმა 2018 წელს გაწეული მუშაობა შეაჯამა და აღნიშნა, რომ საანგარიშო პერიოდში ამომრჩეველთან შეხვედრა ინფრასტრუქტურულ და სოციალურ საკითხებზე გამართა. აქტიურად განიხილავდა აზიურ ფაროსანასთან ბრძოლის საკითხებს, რომელიც 2018 წელს ოთხ ეტაპად ჩატარდა.
მისი შუამდგომლობით არაერთ მოქალაქეს გაეწია დახმარება სხვადასხვა სოციალური დახმარების ფარგლებში. სტიქიით დაზარალებულ მოსახლეობას გადაეცათ სახლის სახურავის მასალა.
მაჟორიტარმა ისაუბრა სოფელში შესრულებულ და მიმდინარე ინფრასტრუქტურულ პროექტებზე:
რკინა-ბეტონის გზა მოეწყო გაგურში , აკეთის კულტურის სახლის მიმდებარედ, ქვემო აკეთში ყოფილი ჩაის ფაბრიკასთან, ზეგანში, ზემო აკეთსა და ჭანჭათში. მოეწყო ხიდები, მილხიდი და ნაპირსამაგრი.
აკეთის ადმინისტრაციულ ერთეულში შიდა გზების აღდგენაზე დაიხარჯა 19947 ლარი, ხოლო ღია სანიაღვრე არხების მოწყობაზე 8000 ლარი.
სოფლის მხარდაჭერის პროგრამის ფარგლებში ზემო და ქვემო აკეთში მოეწყო გარე განათება, გაგურში რეაბილიტირდა წყალსადენის ნაგებობა, ქვემო აკეთსა და ჭანჭათში გარემონტდა კულტურის სახლში ოთახები.
შეხვედრაზე დაისვა პრობლემები: წყალმომარაგების, გაზიფიცირების, მოსაცდელის, სასაფლაოს შემოღობვისა და შიდა გზების მოწესრიგების საკითხები.
ანგარიშის წარდგენას საკრებულოს თავმჯდომარის მოადგილე ვლადიმერ ნანაძე დაესწრო.
სრულად ანგარიშის ტექსტური მასალა იხილეთ მუნიციპალიტეტის ვებ გვერდზე www.lanchkhuti.gov.ge
