დღეს, ლანჩხუთის მუნიციპალიტეტის საკრებულოს იურიდიულ საკითხთა და ეთიკის კომისიის სხდომა გაიმართა, რომელსაც ვერიკო კვირკველია უძღვებოდა.
კომისიამ ა(ა)იპ ,,კულტურის დაწესებულებათა გაერთიანებისა” და ა(ა)იპ ,,სკოლამდელი საგანმანათლებლო- სააღმზრდელო ცენტრის” ანგარიშები მოისმინა. ორივე ა(ა)იპ-ის მიერ წარმოდგენილი ანგარიში კომისიამ დადებითად შეაფასა.
ა(ა)იპ ,, კულტურის დაწესებულებათა გაერთიანების” დირექტორმა დავით წერეთელმა საანგარიშო პერიოდში განხორციელებულ პროექტებზე და სამუშაოებზე, ასევე სამომავლო გეგმებზეც გაამახვილა ყურადღება.
მისი თქმით, 2018 წლიდან დღემდე არაერთი მნიშვნელოვანი ღონისძიება ჩატარდა გაერთიანებაში შემავალ მუზეუმებში, ბიბლიოთეკაში, კულტურის ცენტრში, ასევე აქტიურად მონაწილეობდნენ გასვლით ღონისძიებებში სხვადასხვა რეგიონში.
წერეთელმა ისაუბრა საერთაშორისო წარმატებებზე : ანსამბლი ,,მხედრები“ შვეიცარიაში იმყოფებოდა კულტურის დღეებზე, ეგნატე ნინოშვილის სახელობის თეატრი კი პარიზში სპექტაკლით ,,დაარქვი რაც გინდა“, ბავშვთა ცეკვის ანსამბლი ,,იმედი“ მონაწილეობდა ბაქოში გამართულ ფოლკლორულ ფესტივალში.
საანგარიშო პერიოდში გაიმართა ოთხი სპექტაკლის პრემიერა, მათ შორის თოჯინური სპექტაკლების. ლანჩხუთმა უმასპინძლა მნიშვნელოვან ღონისძიებებს: ფესტივალ ,,არტ-გენს“, ანსამბლ ,,შავნაბადას“ კონცერტს, ბათუმის დრამატულ თეატრის სპექტაკლს , მურმან ჯინორიას, ცოცხალ წიგნებს, იუმორინას და ა. შ.
დავით წერეთელმა განხორციელებულ ინფრასტრუქტურულ სამუშაოებზეც ისაუბრა. ლანჩხუთის შემოქმედთა მუზეუმის ეზოში მოეწყო გარე წყალსაწრეტი ღარი, ვ. წულაძის თეატრისა და კინოს მუზეუმის ეზოში მოეწყო სკვერი და გარემონტდა ადმინისტრაციის 2 ოთახი, კულტურის ცენტრში ფოლკლორის კაბინეტი, ბავშვთა მუსიკის შემსწავლელი წრეების სარეპეტიციო ოთახები, დაწყებულია კულტურის სახლის შენობის გარე ფასადის რეაბილიტაცია, ე. ნინოშვილის მემორიალურ მუზეუმში განხორციელდა გურული ეთნოგრაფიული კომპლექსის აღდგენა-რესტავრაცია. ამავე პერიოდში, კულტურის ცენტრში სცენის ფარდისა და განათების აპარატურა შეიძინეს, ხოლო საოფისე ინვენტარი ცენტრალურ ბიბლიოთეკის, ე. ნინოშვილის მუზეუმისა და კულტურის ცენტრისთვის.
წერეთელმა ასევე გაერთიანების სტრუქტურა წარმოადგინა, რომლის მიხედვით 89 ადამიანია დასაქმებული აღნიშნულ ცენტრში. კომისიის მხრიდან დაისვა შეკითხვები სამომავლო გეგმებთან დაკავშირებით. საბოლოო ჯამში, ანგარიში დადებითად შეფასდა.
ა(ა)იპ ,,ლანჩხუთის მუნიციპალიტეტის სკოლამდელი საგანმანათლებლო-სააღმზრდელო ცენტრის” ანგარიში, დირექტორმა ნატა კობალავამ წარმოადგინა. სკოლამდელი საგანმანათლებლო ცენტრი 21 საბავშვო ბაღს აერთიანებს. 2018 წელს ბავშვთა რაოდენობა 1165 შეადგენდა, 2019 წელს – 1172.
ცენტრის დირექტორის განცხადებით, 2018-2019 წლებში მეთოდური გეგმის მიხედვით ჩატარდა სეზონური შემეცნებითი- გასართობი აქტივობები. ყურადღება ექცევა ხარისხიან განათლებას, იმ უნარ-ჩვევების განვითარებას, რასაც ადრეული და სკოლამდელი აღზრდისა და განათლების სტანდარტები ითვალისწინებს. ინკლუზიური განათლების წარმატებულად განხორციელების მიზნით, ,,ენისა და მეტყველების თერაპევტთა ასოციაციის“ მიერ გადამზადდა სკოლამდელი დაწესებულების ფსიქოლოგები, ლოგოპედები და აღმზრდელები.
კობალავამ ინფორმაცია წარმოადგინა ბიუჯეტის, კვების ხარჯის, გამოცხადებული ტენდერების, შრომის ანაზღაურებისა და სხვადასხვა ხარჯის შესახებ. როგორც აღნიშნა, საანგარიშო პერიოდში განხორციელდა ბაღების მატერიალურ-ტექნიკური ბაზის განახლება. შეიძინეს 12 994 ლარის ავეჯი, 8883 ლარი დაიხარჯა სახანძრო, სამაშველო და უსაფრთხოების მოწყობილობებისთვის, შეიძინეს 9780 ლარის საგანმანათლებლო რესურსები, 4750 ლარის სათამაშოები.
სხვადასხვა სახის ინფრასტრუქტურული სამუშაოები ჩატარდა ღრმაღელის, წყალწმინდის, ლესის, ნინოშვილის, ნიგვზიანისა და ჩიბათის საბავშვო ბაღებში. რაც შეეხება 2019 წელს თანამედროვე სტანდარტის შესაბამისი შენობების მშენებლობა იწყება სუფსაში, ხაჯალიასა და აცანაში.
ნატა კობალავას განცხადებით, მერიასთან შეთანხმებით დაწყებულია პროექტზე მუშაობა საბავშვო ბაღში სარემონტო სამუშაოების ჩასატარებლად, ასევე მატერიალურ-ტექნიკური ბაზის გასაუმჯობესებლად.
კომისიამ წარმოდგენილი ანგარიში ასევე დადებითად შეაფასა.
#ლანჩხუთი2019
#კომისიისსხდომა
#ანგარიში2018
