ლანჩხუთის მუნიციპალიტეტის მერია 2020 წელს სხვადასხვა სოციალურ პროგრამას განახორციელებს.
ამ საკითხთა დაკავშირებით დღეს მერიაში სამუშაო შეხვედრა გაიმართა, რომელსაც მერი ალექსანდრე სარიშვილი და მოადგილე ეკატერინე გუჯაბიძე ესწრებოდნენ.
მერიის ჯანდაცვისა და სოციალური სამსახურის უფროსმა თამარ ფირცხალაიშვილმა, დამსწრე საზოგადოებას გააცნო ის სოციალური პროგრამები, რომელსაც მერია მიმდინარე წელს განახორციელებს. ესენია: მზრუნველობა მოკლებულთათვის უფასო კვებით უზრუნველყოფის, მრავალშვილიანი ოჯახების დახმარების, მძიმე საცხოვრებელ პირობებში მყოფი ოჯახების დროებით თავშესაფრით უზრუნველყოფის, ომის ვეტერანებისა და მათი ოჯახების დახმარების, მოსწავლეთა ტრანსპორტირების, ცენტრ „იავნანას“ თანადაფინანსების, თირკმლის ქრონიკული უკმარისობით დაავადებულთა სამედიცინო დაწესებულებაში ტრანსპორტირების დაფინანსების, იძულებით გადაადგილებულ პირთა დახმარების, სამკურნალო და საოპერაციო ხარჯებით დახმარების, მძიმე საცხოვრებელ პირობებში, სტიქიური მოვლენების შედეგად დაზარალებული ოჯახებისათვის ერთჯერადი ფულადი დახმარების პროგრამები. ასევე, „გამარჯვებულ ქალთა კლუბის“ სარეაბილიტაციო თანადაფინანსების, ხანდაზმულ (100 და მეტი წლის ასაკის) პირთა და მედიკამენტების შეძენაზე დახმარების პროგრამები. ისაუბრეს გაცემის წესსა და იმ დოკუმენტაციებზე, რომლის წარდგენაც ბენეფიციარს სოციალური დახმარების მისაღებად დასჭირდება.
გარდა ამისა, ალექსანდრე სარიშვილმა, ადმინისტრაციულ ერთეულებში მერის წარმომადგენლებისაგან, სოფლებში არსებული ვითარების შესახებ დეტალური ინფორმაცია მიიღო.
