ლანჩხუთის მუნიციპალიტეტის მერი, ალექსანდრე სარიშვილი, საკრებულოს თავმჯდომარე ბესიკ ტაბიძე და საკრებულოს მაჟორიტარი დეპუტატი აკეთიდან, გიორგი მორჩილაძე აკეთის ადმინისტრაციულ ერთეულში შემავალ სოფელ ჭანჭათის მოსახლეობას შეხვდნენ. ამ დროისთვის ჭანჭათში გაზსადენის მაგისტრალის გაყვანა მიმდინარეობს. ზაფხულისთვის კი ბუნებრივი აირით 240 ოჯახი ისარგებლებს. ადგილობრივი ხელისუფლების პირველი პირები და სამუშაოების შემსრულებელი კომპანიის წარმომადგენელი მოსახლეობასთან ერთად არსებულ მდგომარეობას გაეცნენ და სამუშაოების შესრულების დროს წარმოქმნილ პრობლემებზეც ისაუბრეს, რომელიც ძირითადად შიდა მიმოსვლის გზას შეეხებოდა. კომპანიის წარმომადგენლის თქმით, სამუშაოების დასრულების შემდეგ ორგანიზაცია ყველა დაზიანებულ გზას პირვანდელ მდგომარეობაში მოიყვანს. შეგახსენებთ, რომ გაზსადენის მაგისტრალის გაყვანის შემდეგ აკეთის ადმინისტრაციულ ერთეულში ბუნებრივ აირს 700 ოჯახი მოიხმარს.
