ლანჩხუთის მუნიციპალიტეტის მერი ალექსანდრე სარიშვილი, პირველ მოადგილე ეკატერინე გუჯაბიძესთან და საკრებულოს თავმჯდომარე ბესიკ ტაბიძესთან ერთად, „ვარდისფერი ოქტომბრის“ ფარგლებში გამართულ ღონისძიებებს დაესწრო.
ლანჩხუთის საზოგადოებრივი ჯანდაცვის ცენტრში, ძუძუს კიბოს პრევენციისა და ადრეული გამოვლენის მნიშვნელობის შესახებ საინფორმაციო შეხვედრა გაიმართა. დაავადებათა კონტროლისა და საზოგადოებრივი ჯანმრთელობის ეროვნული ცენტრის წარმომადგენლებმა ადგილობრივ მოსახლეობასთან კიბოს სკრინინგის მნიშვნელობაზე ისაუბრეს და ყურადღება ადრეული დიაგნოსტიკის აუცილებლობაზე გაამახვილეს.
მუნიციპალიტეტის მერი და საკრებულოს თავმჯდომარე კამპანიის ფარგლებში ლანჩხუთის სკრინინგ ცენტრშიც იმყოფებოდნენ, სადაც ადგილობრივ მცხოვრებლებს შესაძლებლობა ჰქონდათ, სხვადასხვა სახის უფასო გამოკვლევა ჩაეტარებინათ.
„ვარდისფერი ოქტომბრის“ ფარგლებში გამართულ ღონისძიებებს ლანჩხუთის სკრინინგ ცენტრის მენეჯერი, საზოგადოებრივი ჯანდაცვის დოქტორი თინათინ ბერუჩაშვილი, დაავადებათა კონტროლის ეროვნული ცენტრის გურიის განყოფილების ხელმძღვანელი არჩილ მჟავია, ლანჩხუთის, ოზურგეთისა და ჩოხატაურის საზოგადოებრივი ჯანდაცვის ცენტრების ხელმძღვანელები, საკრებულოს დეპუტატები და ქალთა ორგანიზაციის გურიის რეგიონული საბჭოს ხელმძღვანელი ვერიკო კვირკველია ესწრებოდნენ.
