3 ივნისს, ლანჩხუთის მუნიციპალიტეტის საკრებულოს წევრმა, ლელა ჩახვაძემ ნინოშვილის ადმინისტრაციულ ერთეულში ამომრჩეველს 2018 წელს გაწეული მუშაობის შესახებ ანგარიში წარუდგინა.
,,ადგილობრივი თვითმმართველობის კოდექსითა და საკრებულოს რეგლამენტით განსაზღვრული მოთხოვნების შესაბამისად, საანგარიშო პერიოდში უფლებამოსილებას ვანხორცილებდი საკრებულოს ორ მუდმივმოქმედ კომისიაში (სივრცით-ტერიტორიული დაგეგმარებისა და ინფრასტრუქტურის კომისია; სოციალურ საკითხთა, განათლების, კულტურისა და ახალგაზრდულ საქმეთა კომისია), ასევე ვიყავი ფრაქცია „ლანჩხუთელები ძლიერი თვითმმართველობისათვის“ თავმჯდომარე“, აღნიშნა ლელა ჩახვაძემ.
საკრებულოს წევრის განცხადებით, აქტიურად მონაწილეობდა საკრებულოს თავმჯდომარის და საკრებულოს თავმჯდომარის მოადგილის მიერ მოწვეულ თათბირებში, საკრებულოს მიერ კანონქვემდებარე სამართლებრივი აქტების მიღება-დამტკიცებაში და 2019 წლის ბიუჯეტის პროექტის საჯარო განხილვებში. მისისვე თქმით, ესწრებოდა ყველა იმ შეხვედრას, რომელიც აზიური ფაროსანას წინააღმდეგ ბრძოლას, თხილის მოვლისა და წამლობის ღონისძიებებს ეხებოდა.
საკრებულოს სხდომაზე დააყენა ბაგა-ბაღის თანამშრომლებისთვის ხელფასის მომატების, სოფელ ნინოშვილის კულტურის სახლში განათების მოწყობის, გრიგოლეთის სანაპირო ზოლის კეთილმოწყობის და ხეების გაჩეხვის შეჩერებისა და სხვა მნიშვნელოვანი საკითხები.
,,მე როგორც საკრებულოს წევრი გავაგრძელებ აქტიურ მუშაობას, რათა 2019 წელი იყოს უფრო ნაყოფიერი მუნიციპალიტეტის მოსახლეობისთვის”, განაცხადა საკრებულოს წევრმა.
მოსახლეობამ მთავარ პრობლემად აზიური ფაროსანას შეწამვლის საკითხი და ინფრასტრუქტურის არასწორი დაგეგმარება დაასახელა.
შეხვედრას საკრებულოს სივრცით-ტერიტორიული დაგეგმარებისა და ინფრასტრუქტურის კომისიის თავმჯდომარე გიორგი გვარჯალაძე და საკრებულოს წევრი დავით ჩხარტიშვილი ესწრებოდნენ.
#გურია2019 #ლანჩხუთი2019 #ნინოშვილი
