ლანჩხუთის მუნიციპალიტეტის საკრებულოს წევრი, გვიმბალაურის ადმინისტრაციული ერთეულის მაჟორიტარი – ცისანა ურუშაძე ამომრჩეველს შეხვდა და მის მიერ გაწეული მუშაობის შესახებ ანგარიში წარუდგინა.
მაჟორიტარმა საკრებულოს კომისიებში მის მიერ გაწეულ აქტივობებზე ისაუბრა. როგორც აღნიშნა, ასვე აქტიურად არის ჩართული გენდერული თანასწორობის საბჭოს მუშაობაში. სწორედ გენდერული თანასწორობის საბჭოს და არასამთავრობო ორგანიზაციის ,,ქალები სამართლიანობისთვის“ მხარდაჭერით გვიმბალაურში დაარსდა ,,ქალთა კლუბი“, რომელიც საქველმოქმედო ღონისძიებებში არის ჩართული.
გვიმბალაურის მაჟორიტარს საანგარიშო პერიოდში არაერთხელ ჰქონდა ამომრჩეველთან შეხვედრა სოციალურ, ინფრასტრუქტურულ და აზიურ ფაროსანასთან ბრძოლის საკითხებზე.
საანგარიშო პერიოდში დახმარება გაეწია არაერთ მოქალაქეს სამკურნალო და საოპერაციო , მედიკამენტების, ც ჰეპატიტის, ქირავნობის, ვეტერანების, სათბობი შეშით დახმარების პროგრამის ფარგლებში. სტიქიის შედეგად დაზარალებულ მოსახლეობა უზრუნველყვეს სახურავისა და სამშენებლო მასალით.
მაჟორიტარმა ყურადღება გაამახვილა მერიის მხარდაჭერით გვიმბალაურის ადმინისტრაციულ ერთეულში განხორციელებულ ინფრასტრუქტურულ პროექტებზე. ბეტონის საფარი დაიგო
გვიმბალაური – ჯაბელისა და ზემო ჩიბათი- ჯუნეწრის დამაკავშირებელ მონაკვეთებზე, სოფლის მხარდაჭერის პროგრამის ფარგლებში წელს გვიმბალაურსა და ჯუნეწერში მოეწყო სპორტული მოედანები და გვიმბალაურში შემოიღობა სასაფლაოს ეზო.
საკრებულოს წევრმა იმ პრობლემურ საკითხებზეც ისაუბრა, რომელთა მოგვარება სოფლისთვის პრიორიტეტს წარმოადგენს: სანიაღვრე არხების მოწყობა ჯუნეწერში, გვიმბალაურში წყლის სათავე ნაგებობის რეაბილიტაცია, წყალმომარაგების შიდა ქსელის მოწყობა, ,,სოკარის“ მიმდებარე ტერიტორიაზე სკვერის რეაბილიტაცია, საბავშვო ბაღის აშენება.
მისივე თქმით, სასურველი იქნება გვიმბალაურის ყოფილი სკოლის შენობა ფუნქციური გახდეს და მასში შშმ ბავშვთა სარეაბილიტაციო დღის ცენტრი და სოციალური საწარმოს განთავსდეს. არასამთავრობო ორგანიზაციამ ,,ბავშვი და გარემო“ პროექტი მოამზადა, მოსაძიებელია ფინანსები.
შეხვედრას საკრებულოს თავმჯდომარე ბესიკ ტაბიძე, მოადგილე ვლადიმერ ნანაძე და საკრებულოს ფრაქცია ,,ქართული ოცნება-მწვანეების“ თავმჯდომარე ზაზა წულაძე ესწრებოდნენ.
ცისანა ურუშაძემ მადლობა გადაუხადა მოსახლეობას და აღნიშნა, რომ აქტიურად გააგრძელებს მათთან თანამშრომლობას და სოფელში არსებულ პრობლემების აღმოსაფხვრელად მუშაობას.
#გურია2019
#ლანჩხუთი2019
#გვიმბალაური
#შეხვედრაამომრჩეველთან
