2018 წელს გაწეული საქმიანობა, დღეს, ამომრჩევლების წინაშე საკრებულოს წევრმა, შუხუთის ადმინისტრაციული ერთეულის მაჟორიტარმა აკაკი იმნაიშვილმა შეაჯამა.
ანგარიშის წარდგენას საკრებულოს თავმჯდომარე ბესიკ ტაბიძე დაესწრო, რომელმაც აღნიშნა, რომ შეხვედრის მიზანი, გადაწყვეტილების მიღების პროცესში მოსახლეობის ჩართულობაა.
მაჟორიტარმა შუხუთის ამომრჩეველს გააცნო ის პრობლემური საკითხები, რომლებიც საკრებულოსა და კომისიის სხდომებზე დასვა: საყანე ფართობებთან დამაკავშირებელი ხიდების აღდგენის, ინერტული მასალის გადასაზიდად ალტერნატიული გზის მოძებნის, გარე განათების მოწყობის, შუხუთის ცენტრის დასუფთავების, გზების და სანიაღვრე არხების მოწესრიგების, ასევე წყლისა და გარე განათების საკითხები და სხვ.
საკრებულოს წევრის შუამდგომლობით დახმარება გაეწია მოსახლეობას მედიკამენტების შეძენის, სამკურნალო და საოპერაციო, მრავალშვილიანი ოჯახების, ქირავნობის, საშეშე მერქნის, ერთჯერადი დახმარების პროგრამის ფარგლებში.
აკაკი იმნაიშვილმა ისაუბრა იმ პროექტებზე, რომლებიც შუხუთის ადმინისტრაციულ ერთეულში საანგარიშო პერიოდში განხორციელდა: რეაბილიტაცია ჩაუტარდა ზემო და ქვემო შუხუთის წყლის სათავე ნაგებობას, მოეწყო ნაპირსამაგრები (საერთო ღირებულებით 65324 ლარი), დამცავი გაბიონები, განხორციელდა დაზიანებული ხიდის დემონტაჟი და მოეწყო ახალი, მანტკავების უბანში დაიგო რკინა-ბეტონის გზა, შუხუთის ცენტრალურ ნაწილში, გოგუაძის უბანში მოეწყო რკინა- ბეტონის სანიაღვრე არხი.
საკრებულოს წევრის თქმით, მიმდინარე წელს სოფლის მხარდაჭერის პროგრამით როგორც ზემო, ისე ქვემო შუხუთში მოეწყობა გარე განათება და რეაბილიტაცია ჩაუტარდება სოფლის ამბულატორიას.
როგორც იმნაიშვილმა აღნიშნა, იგეგმება საყანე ფართობებთან დამაკავშირებელი 2 ხიდის აღდგენა და გორის გვერდზე მიმავალ გზაზე სანიაღვრე არხების მოწყობა.
შეხვედრაზე დაისვა საბავშვო ბაღსა და სკოლაში სასმელი წყლის პრობლემა, შიდა გზების მოწესრიგებისა და აცანასთან დამაკავშირებელ გზაზე სიჩქარის შემზღუდავის მოწყობის საკითხი.
მოსახლეობამ მადლობა გადაუხადა მაჟორიტარს გამოჩენილი ყურადღებისთვის და გულისხმიერებისთვის.
სრულად ანგარიშის ტექსტური მასალა იხილეთ: www.lanchkhuti.gov.ge
#გურია2019 #შუხუთი2019 #წლისანგარიში2018
