ლანჩხუთის კულტურის დაწესებულებათა გაერთიანების ფოლკლორის კაბინეტში სახალხო მთქმელის, ნიგვზიანის მკვიდრის, ვახტანგ ტაბიძის 85 წლისთავისადმი მიძღვნილი საიუბილეო საღამო გაიმართა. ვახტანგ ტაბიძე ფიზიკა-მათემატიკას ასწავლიდა ჯერ ხულოს რაიონის სოფელ ღორჯომში, შემდეგ მშობლიურ ნიგვზიანის სკოლაში, ხოლო სიცოცხლის ბოლომდე გულიანის სკოლის პედაგოგი იყო. ის ძალიან ახალგაზრდა, 43 წლისა გარდაიცვალა. მიუხედავად მათემატიკური ნიჭისა, ვახტანგ ტაბიძე იყო შესანიშნავი ლექსების ავტორი, განსაკუთრებული იუმორით დაჯილდოებული ადამიანი, კაფიების დიდოსტატი, შესანიშნავი მეუღლე და მამა. საღამოზე, რომელსაც ვახტანგ ტაბიძის ოჯახის წევრების გარდა, მისი მეგობრებიც ესწრებოდნენ, გაიხსენეს, რომ ის ასევე არაჩვეულებრივად მღეროდა. თავდაპირველად ლიტერატურული კომპოზიცია, რომელიც ვახტანგ ტაბიძის შემოქმედებასა და ბიოგრაფიას მიეძღვნა, ლანჩხუთის ეგნატე ნინოშვილის სახელობის სახალხო თეატრის მსახიობებმა: ბაჩო ხუხუნაიშვილმა, გურამ იმნაძემ და ქრისტინე ლორიამ წარმოადგინეს. შემდეგ კი ვახტანგ ტაბიძის ლექსები წაიკითხეს მისმა ახლობლებმა, ბევრი ისაუბრეს მასზე, როგორც შემოქმედზე, ნიჭიერ პედაგოგზე და უბრალოდ, კარგ ადამიანზე. საღამოს დასასრულს, ბატონი ვახტანგის ქალიშვილმა, ბათუმის ნავიგაციის სასწავლო უნივერსიტეტის პროფესორმა, ნაირა ტაბიძემ, დიდი მადლობა გადაუხადა ამ საღამოს ყველა ორგანიზატორს: – არ ველოდი, რომ ასეთი თბილი საღამო იქნებოდა. მადლობა ყველას, მადლობა თითოეულ ადამიანს, ვისაც ამ საღამოს იდეა გაუჩნდა. შვილისთვის იმაზე საამაყო არაფერია, ვიდრე ის, რომ მშობელს ასეთი სითბოთი მოიხსენიებენ. კიდევ ერთხელ გმადლობთ, – დასძინა ქალბატონმა ნაირამ. ბატონი ვახტანგის ვაჟი, ბესიკ ტაბიძე, რომელიც ლანჩხუთის მუნიციპალიტეტის საკრებულოს თავმჯდომარეა, ემოციებს ვერ მალავდა: – დიდი მადლობა ყველას. არ შემიძლია ემოციების დამალვა. ძალიან ლამაზი საღამო გამოვიდა. მე დღეს გამიცოცხლდა მამა, რომელიც 15 წლისამ დავკარგე, – გვითხრა ბატონმა ბესიკმა. საღამოს ლანჩხუთის მუნიციპალიტეტის მერი, ალექსანდრე სარიშვილი, მოადგილე, ეკა გუჯაბიძე, მერიის განათლების, კულტურის, სპორტისა და ახალგაზრდულ საქმეთა სამსახურის უფროსი ია ჩხაიძე, საკრებულოს თავმჯდომარის მოადგილე ვლადიმერ ნანაძე და მერიისა და საკრებულოს თანამშრომლებიც ესწრებოდნენ. მუსიკალურად საღამოს ალამაზებდნენ ტრიო “ცისიერი” და ანსამბლი “აცაურა”.
