2008 წლის 11 აგვისტოდან 11 წელი გავიდა. წელსაც, ჩვეულებისამებრ, ტრაგედიის ადგილას სოფელ შინდისში, 17 გმირის ხსოვნას პატივი მიაგო ლანჩხუთის ადგილობრივმა ხელისუფლებამ და გვირგვინებით შეამკეს გმირთა მემორიალი. იქვე პანაშვიდი გადაიხადა მამა დავითმა (წულაძე). “შინდისში შეწყდა ჩემი შვილის, რუსლანის სიცოცხლე. რუსლანისნაირი ბიჭები წერენ ისტორიას. ასეთ ბიჭებზე იწერება ლექსები, სიმღერები. მას უყვარდა სამხედრო საქმე, უყვარდა თავისი სამშობლო. ბოლო წუთამდე გვიმალავდა, რომ ომში იყო. უკანასკნელად ივლისის ბოლოს ვესაუბრე და მივხვდი, რომ იბრძოდა. არ შეგეშინდეს, მალე დავბრუნდებიო, დამაიმედა. ვერ დამიბრუნდა. ქედს ვიხრი გმირების ხსოვნის წინაშე. დიდება მათ სახელს” – გვითხრა რუსლან წულაძის დედამ, ლიდია წულაძემ. “სამაგალითოა ამ ბიჭების თავდადება. ჩვენი ვალია პატივი მივაგოთ მათ ნათელ ხსოვნას” – განაცხადა ალექსანდრე სარიშვილმა. 11 წლის წინ, 2008 წლის 11 აგვისტოს, შინდისში 17 ქართველმა მეომარმა არნახული წინააღმდეგობა გაუწია რუსულ ასეულს და უთანასწორო ბრძოლაში დაიღუპა. მათ შორის ორი ლანჩხუთელი იყო: ემზარ წილოსანი და რუსლან წულაძე.
