„ევროპის მემკვიდრეობის დღეებს“ ლანჩხუთის მუნიციპალიტეტიც შეუერთდა. „ხელოვნება და სანახაობა“ ფარგლებში სხვადასხვა ღონისძიებები გაიმართა.
თავდაპირველად ვილი ბარამიძის სახელობის სამხატვრო სკოლაში მოსწავლეთა და პედაგოგთა გამოფენა მოეწყო. ამავე დროს სკოლას მხატვარი გურამ მიქაძე სტუმრობდა. ბატონი გურამი ჩოხატაურის მუნიციპალიტეტში ცხოვრობს. მან ლანჩხუთში გურული ჩანახატები ჩამოიტანა და დამთვალიერებელს წარუდგინა.
„ევროპის მემკვიდრეობის დღეებს“ მიეძღვნა ღონისძიება ლანჩხუთის სამუსიკო სკოლაშიც. მარიკა ორაგველიძის სახელობის სკოლისა და სუფსის სამუსიკო სკოლის პედაგოგებმა მოსწავლეებთან ერთად კონცერტი გამართეს.
ღონისძიებებს მუნიციპალიტეტის მერის მოადგილე ეკა გუჯაბიძე, განათლების, კულტურის, სპორტისა და ახალგაზრდულ საქმეთა სამსახურის უფროსი ია ჩხაიძე და ადგილობრივი თვითმმართველობის სხვა წარმომადგენლები ესწრებოდნენ.
„ევროპის მემკვიდრეობის დღეები“ საქართველოს განათლების, მეცნიერების, კულტურისა და სპორტის სამინისტროსა და ლანჩხუთის მუნიციპალიტეტის მერიის მხარდაჭერით ჩატარდა.
