სოფელ ორაგვეში ტურისტული ინფრასტრუქტურის მოწყობა იწყება

 

 

საქართველოს სახელმწიფო ბიუჯეტის, ევროპის კავშირის ფინანსური კონტრიბუციის, ასევე, საერთაშორისო დონორი ორგანიზაციების, მუნიციპალიტეტებისა და კერძო სექტორის ფინანსური მხარდაჭერით საქართველოში ხორციელდება ,,2020 – 2022 წლების საპილოტე რეგიონების ინტეგრირებული განვითარების პროგრამა“. პროგრამის მიზანია თავისი წვლილი შეიტანოს ქვეყნის განვითარებაში რეგიონული უთანაბრობების შემცირების და დაბალანსებული სოციალურ-ეკონომიკური განვითარების გზით.

პროგრამის მთლიანი ღირებულება 3 წლის განმავლობაში 67.23 მილიონი ევროა.

ლანჩხუთის მუნიციპალიტეტის მერიის მიერ, ადგილობრივი საჭიროებების დეტალური შეფასების საფუძველზე და დაინტერესებულ მხარეთა ფართო სპექტრის ჩართულობით (მათ შორის ადგილობრივი მოსახლეობა, სამეწარმეო საქმიანობის სუბიექტები, არასამთავრობო ორგანიზაციები) გამოიკვეთა, რომ მუნიციპალიტეტის ეკონომიკური ზრდა- განვითარებისათვის მნიშვნელოვანია ტურიზმის განვითარება.

 

ამის გათვალისწინებით შეირჩა  საპროექტო იდეა ,,ლანჩხუთის მუნიციპალიტეტის სოფელ ორაგვეში ტურისტული ინფრასტრუქტურის მოწყობა  და მისასვლელი გზის რეაბილიტაცია   ადგილობრივი ბიზნესის სტიმულირების მიზნით“.

ლანჩხუთის მუნიციპალიტეტში სოფელი ორაგვე სილამაზით გამორჩეული სოფელია. მისი ისტორია მე-7 საუკუნიდან იწყება. სოფელში ეკოლოგიურად სუფთა უამრავი საპიკნიკე და გასართობი სივრცეა, სოფლის მშვენებაა ეშკანის წყალუხვი ჩანჩქერი. სოფელში ორი გამოქვაბულია (ლანჩხუთის მუნიციპალიტეტში ყველაზე დიდი).  სოფელს  ბუნებრივი სიმდიდრეების სწორად გამოყენების შემთხვევაში არაჩვეულებრივი ტურისტული პოტენციალი გააჩნია. ბოლო წლებში სოფელში აშენდა ულამაზესი სამონასტრო კომპლექსი.

პროექტის ფარგლებში განხორციელდება სოფელ ორაგვესთან მისასვლელი 4,3 კმ გზის მოასფალტება, მოეწყობა საჭირო ხელოვნური ნაგებობები. ეშკანის კანიონთან მოეწყობა დასასვენებელი და საპიკნიკე ადგილები, სოფელში არსებულ მე-7 საუკუნის გამოქვაბულთან მოეწყობა სველი წერტილი, საპიკნიკე და საპარკინგე ადგილი,    საფეხმავლო და  ველობილიკი.  შეიქმნება ახალი ტურისტული მარშრუტი.  მნიშვნელოვნად გაიზრდება ვიზიტორებისათვის  ლანჩხუთის მუნიციპალიტეტის მიმზიდველობა.  აგრო ტურიზმისა და საოჯახო სასტუმროების განვითარებით შეიქმნება ახალი სამუშაო ადგილები.

 

Share:

კომენტარის დატოვება