ლანჩხუთის „გურიას“ ვეტერან ფეხბურთელებს ნოშრევან ნარიაშვილსა და თამაზ კვირკველიას იუბილე მიულოცეს.
ლეგენდარული ფეხბურთელი ნოშრევან ნარიაშვილი – 85 წლის, ხოლო ბატონი თამაზი დღეს 80 წლის გახდა.
ადგილობრივი ხელისუფლების პირველმა პირებმა ვეტერან ფეხბურთელებთან ერთად გვირგვინით შეამკეს „გურიას“ დიდი ქომაგისა და მეცენატის ევგრაფ შევარდნაძის ბიუსტი. შემდეგ კი სპორტის მუზეუმში შეიკრიბნენ და ერთად გაიხსენეს ის წლები, როცა „გურია“ წარმატებით ასპარეზობდა. გუნდის ვეტერანმა კაპიტანმა, თემურ ჩხაიძემ ,ვრცლად ისაუბრა და გაიხსენა ის ფეხბურთელები, რომლებიც წლების განმავლობაში ლანჩხუთის „გურიას“ ღირსებას იცავდნენ.
„- მინდა მადლობა გადავუხადო ორგანიზატორებს ამ დღისთვის. ყოველთვის ძალიან მიხარია ლანჩხუთში ჩამოსვლა… მადლობა ამ სითბოსა და სიყვარულისთვის“ -განაცხადა ნოშრევან ნარიაშვილმა.
ღონისძიების ორგანიზატორი ლანჩხუთის „გურიას“ ვეტერან ფეხბურთელთა კავშირი და მუნიციპალიტეტის მერია გახლდათ.
