ლანჩხუთის მარიკა ორაგველიძის სახელობის საკონცერტო დარბაზში კარლ ჩერნის სახელობის კონკურსის საზეიმო დახურვა გაიმართა.
კონკურსი, რომელიც 2 ივნისს გაიხსნა, საქართველოს ხელოვნების აკადემიის რექტორის, გამოჩენილი პიანისტის ვალერიან შიუკაშვილის ხელმძღვანელობით ჩატარდა.
წელს კონკურსი მესამედ გაიმართა და მასში საქართველოს სხვადასხვა რეგიონიდან 24 სამუსიკო სკოლა და 120 კონკურსანტი მონაწილეობდა.
დასკვნით ღონისძიებას ლანჩხუთის მერის პირველი მოადგილე ეკატერინე გუჯაბიძე ადგილობრივი ხელისუფლების წარმომადგენლებთან ერთად დაესწრო.
“განსაკუთრებულ მადლობას ვუხდი კონკურსის სულისჩამდგმელს, პიანისტ ვალერიან შიუკაშვილს, მარიკა ორაგველიძისა და სუფსის სამუსიკო სკოლების თითოეულ პედაგოგს აქტიური მონაწილეობისთვის. აღნიშნული კონკურსი ლანჩხუთში უკვე მესამედ ჩატარდა. თითოეულ მონაწილეს წარმატებებს ვუსურვებ”, – აღნიშნა ეკატერინე გუჯაბიძემ.
