ლანჩხუთში, ადგილობრივი ხელისუფლების თხოვნით, ევროპის რეკონსტრუქციისა და განვითარების ბანკის, საგზაო დეპარტამენტისა და ავტობანზე სამშენებლო სამუშაოების მწარმოებელი კომპანიის, “სინოჰიდროს” წარმომადგენლები იმყოფებოდნენ. სტუმრებმა ლანჩხუთის მუნიციპალიტეტის მერ ალექსანდრე სარიშვილთან, საკრებულოს თავმჯდომარის მოვალეობის შემსრულებელ ვლადიმერ ნანაძესთან და საკრებულოს ინფრასტრუქტურის კომისიის თავმჯდომარე გიგი გვარჯალაძესთან ერთად ყველა ის მონაკვეთი დაათვალიერეს, სადაც, ადგილობრივების თქმით, სამუშაოები ხარვეზებითაა შესრულებული. ადგილებზე შესაბამის ადმინისტრაციულ ერთეულში მერის წარმომადგენლებიც იმყოფებოდნენ და სტუმრებს თავად აჩვენებდნენ ყველა მცირეოდენ პრობლემასაც კი. სტუმრების მხრიდან აღინიშნა, რომ პრობლემები მართლაც თვალშისაცეცმია. ერთობლივი მოლაპარაკების შედეგად კი გადაწყდა, რომ აბსოლუტურად ყველა ხარვეზი დროულად აღმოიფხვრება და გამოსწორდება.
