ლანჩხუთის მუნიციპალიტეტის საკრებულოს ეკონომიკის, ქონების მართვისა და ბუნებრივი რესურსების საკითხთა კომისიამ მხარი დაუჭირა მუნიციპალიტეტის საკუთრებაში არსებული უძრავი ქონების ა(ა)იპ ლანჩხუთის მუნიციპალიტეტის სახელოვნებო სკოლათა გაერთიანებისათვის პირდაპირი განკარგვის წესით, სარგებლობის უფლებით, უსასყიდლოდ გადაცემას.
გიორგი ჩახვაძემ კომისიის წევრებს 1989 წლის 8-9 აპრილის აქციებში მონაწილეთა სახელით შემოსული განცხადება გააცნო. ისინი ითხოვენ, რომ ლანჩხუთის ცენტრალურ პარკს მიენიჭოს ზვიად გამსახურდიას სახელი, ხოლო 1989 წლის 9 აპრილს დაღუპულთა და ამ აქციებში მონაწილეთა უკვდავსაყოფად, ბაღში მოეწყოს 21 ცალი ტიტას ფორმის დეკორატიული ლამპიონი. აღნიშნულ საკითხთან დაკავშირებით კომისიამ მიზანშეწონილად ჩათვალა, რომ საკრებულოში არსებულმა იურიდიულ საკითხთა და ეთიკის კომისიამ შეისწავლოს და შემდგომში საკრებულოს სხდომაზე წარმოადგინოს.
ასევე კომისიამ სსიპ წიაღის ეროვნული სააგენტოსგან შემოსული წერილი განიხილა სოფელ მამათის მიმდებარე ტერიტორიაზე სასარგებლო წიაღისეულის მოსაპოვებლად ლიცენზიის გაცემის მიზანშეწონილობის შესახებ. როგორც აღინიშნა, სალიცენზიო ობიექტი მიმდებარედ ფიქსირდება წყლის სათავე და წყალშემკრები ავზი, კერძო ნაკვეთები და ასევე შეინიშნება მეწყერული პროცესები. კარიერის ამოქმედების შემთხვევაში შესაძლებელია გააქტიურდეს ეროზიული პროცესები, რაც მოსახლეობას დააზარალებს.
აღნიშნულიდან გამომდინარე, ლანჩხუთის მუნიციპალიტეტის საკრებულოს ეკონომიკის, ქონების მართვისა და ბუნებრივი რესურსების საკითხთა კომისიას მიზანშეწონილად არ მიაჩნია აღნიშნულ ტერიტორიაზე ლიცენზიის გაცემა.
