ქალაქ ლანჩხუთის ბაგა-ბაღში დიდი სტუმრიანობა იყო. პატარებმა ყველანი საახალწლო კარნავალზე მიგვიპატიჟეს. სწორედ ამ დღესთან დაკავშრებით ესტუმრა ქალაქის ბაგა-ბაღს მხარის რწმუნებული ზურაბ ნასარაია, მუნიციპალიტეტის მერი, ალექსანდრე სარიშვილი და ადგილობრივი ხელისუფლების სხვა წარმომადგენლები. კარნავალზე კი იყო პეპიც, სანტა კლაუსიც, ჩვენებური თოვლის პაპაც, უამრავი სიმღერა, ცეკვა, მხიარული და ბედნიერი სახეები, თქვენ წარმოიდგინეთ, თოვლიც კი (რომლის ხელოვნურობას პატარები არად დაგვიდევენ) და რაც მთავარია, ბევრი, ბევრი საჩუქარი. კარნავალის დასრულების შემდეგ სტუმრებმა დამდეგი შობა-ახალი წელი მიულოცეს პატარებს, აღმზრდელებსა და მათ მშობლებს. – მთელი გულით გილოცავთ დამდეგ შობა-ახალ წელს. გისურვებთ ბედნიერ ბავშვობას, ლამაზ მომავალს, ბევრ სიხარულს და სურვილების ასრულებას. ძალიან ლამაზები და გონიერები ხართ. – განაცხადა ზურაბ ნასარიამ. “გილოცავთ, ჩემო პატარებო. მინდა ბედნიერები იყოთ. გისურვებთ ყოველივე საუკეთესოს, ჯანმრთელობას და ბევრ სიხარულს” – დამდეგი ახალი წელი მიულოცა პატარებს ალექსანდრე სარიშვილმა და ქალაქის ბაგა-ბაღის თანამშრომლებს დიდი მადლობა გადაუხადა.
