საქართველოს გარემოს დაცვისა და სოფლის მეურნეობის სამინისტროსა და
გერმანიის საერთაშორისო თანამშრომლობის საზოგადოების (GIZ) ერთობლივი პროექტის
„საქართველოში ტყის სექტორის რეფორმის განხორციელების ხელშეწყობა – „ECO.Georgia”-ს
ფარგლებში, 27 თებერვლიდან ამოქმედდა ენერგო-ეფექტური ღუმელების თანადაფინანსების
პროგრამა.
თანადაფინანსების პროგრამას ახორციელებს სსიპ „სოფლის განვითარების სააგენტო“, პროექტ
„ECO.Georgia“-ს მხარდაჭერით, და ითვალისწინებს შეშის ენერგო-ეფექტური ღუმელის
ღირებულების 30%-ის, არაუმეტეს 300 ლარის დაფინანსებას. პროგრამით სარგებლობა
შესაძლებელია სს „ლიბერთი ბანკის“ მეშვეობით, თანადაფინანსებით სარგებლობის მსურველთა
მიერ განაცხადის შევსების საფუძველზე.
პროგრამისა და პროცედურების შესახებ დეტალური ინფორმაცია, მათ შორის ხელმისაწვდომი
ენერგო-ეფექტური ღუმელების აღწერა, განთავსებულია სსიპ „სოფლის განვითარების სააგენტოს“
ვებგვერდზე: ენერგო-ეფექტური ღუმელების თანადაფინანსების პროგრამა –
www.rda.gov.ge/programs/stoves/;
ტყის სექტორის რეფორმის მხარდაჭერის პროექტი „ECO.Georgia“ ხორციელდება გურიის, კახეთისა
და მცხეთა-მთიანეთის რვა მუნიციპალიტეტში, მათ შორისაა ოზურგეთის, ლანჩხუთისა და
ჩოხატაურის მუნიციპალიტეტები. ზემოთ აღნიშნული თანადაფინანსების პროგრამით სარგებლობა
შეუძლია შესაბამისი მუნიციპალიტეტის ადმინისტრაციულ საზღვრებში მცხოვრებ ნებისმიერ
პირს.
“ECO.Georgia” დაფინანსებულია საქართველოს, გერმანიისა და შვეიცარიის მთავრობებისა და
კლიმატის მწვანე ფონდის (GCF) მიერ და მიზნად ისახავს საქართველოში ტყეზე ზეწოლის
შემცირების მიზნით,ტყის მდგრადი მართვის პრინციპების დანერგვას, ენერგო-ეფექტური და შეშის
ალტერნატიული საწვავის ბაზრის განვითარებას; ასევე ადგილობრივი თვიმმართველობებისა და
ტყესთან ახლოს მდებარე თემთა შესაძლებლობის გაძლიერებას.
