“სოფლის მხარდაჭერის პროგრამის” ფარგლებში მუნიციპალიტეტის სოფლების მოსახლეობასთან შეხვედრები გრძელდება. მუნიციპალიტეტის მერი ალექსანდრე სარიშვილი, მერის პირველი მოადგილე ბიძინა იმნაიშვილი, საკრებულოს თავმჯდომარის მოადგილე ვლადიმერ ნანაძე და მერიისა და საკრებულოს სხვა წარმომადგენლები ღრმაღელის ადმინისტრაციული ერთეულის მოსახლეობას შეხვდნენ. შეხვედრა ერთეულში შემავალ სოფლებში, ომფარეთი, ორმეთი, ღრმაღელე, წყალწმინდა, ცალ-ცალკე ჩატარდა, სადაც თითოეული სოფლის მოსახლეობამ ის პრობლემები წამოჭრა, რაც მათ ასე აწუხებთ. ორმეთში შეთანხმდნენ, რომ გამოყოფილი თანხით გარე განათებას გააგრძელებენ. გარე განათების მოწყობასა და საბავშვო ბაღისთვის რამდენიმე სათამაშოს შეძენაზე შეთანხმდნენ ღრმაღელეში, გარე განათების გაგრძელება მოითხოვეს ასევე ომფარეთში, რაც შეეხება წყალწმინდას, აქ მოსახლეობა წყალწმინდის სასაფლაოსკენ მიმავალი გზის შეკეთებასა და სველი წერტილის მოწყობაზე შეჯერდა, თუმცა ასევე დაისვა საკითხი, რომ თუკი შესაძლებელი იქნება არსებული თანხის ფარგლებში, მოეწყოს საცალფეხო ბილიკიც. შეგახსენებთ, რომ „სოფლის მხარდაჭერის პროგრამა“ რეგიონში განსახორციელებელი პროექტების ფონდიდან ფინანსდება და მიმდინარე წელს ლანჩხუთის მუნიციპალიტეტისთვის 748 000 ლარს შეადგენს. პროექტის ფარგლებში სასმელი წყლის რეაბილიტაცია, სანიაღვრე არხების მოწყობა, ნაპირსამაგრი სამუშაოები, გზების, ხიდებისა და მილხიდების, გარე განათების, სპორტული ინფრასტრუქტურის მოწესრიგება და ა.შ. იგეგმება.
